Relasch

L’enorm relasch nunpublitgà da Peider Lansel sa chatta en sia chasa privata a Sent, en la biblioteca da la Fundaziun de Planta a Samedan ed en l’Archiv svizzer da litteratura a Berna.
Quels relaschs cuntegnan las differentas collecziuns da Peider Lansel: sia biblioteca da gasettas e cudeschs rumantschs (tranter quels era fitg blers vegls), in grond numer da manuscrits rumantschs, tranter auter divers manuscrits da musica, mobiglia e picturas veglias, ina collecziun dad atgnas ed estras fotografias da l’Engiadina ed ina collecziun da veglias chanzuns popularas rumantschas (notaziuns, texts e registraziuns sin cilinders da tschaira).
En pli ha Peider Lansel relaschà blera correspundenza privata, d’affars e politica, manuscrits da sias poesias, manuscrits da ses artitgels ed essais ed ina massa fotografias privatas.
Ils objects ils pli exotics da ses relasch èn forsa la ruina da la baselgia San Peider davos sia chasa ed ina pel cun chau d’in urs da glatsch che ses frar ha sajettà al Cap dal Nord.

Il relasch publitgà sa chatta en las ediziuns originalas (lirica ed essais), en differentas gasettas, revistas e chalenders (essais ed artitgels) ed en las Annalas da la Societad Retorumantscha (lirica, chanzuns popularas, prosa). Tut l’ovra poetica da Peider Lansel è accessibla en l’ediziun dad Andri Peer dal 1966.